FréttirSkrá á póstlista

06.10.2008

Búið að frysta tæp 600 tonn af síldarafurðum á Vopnafirði

Frá því að síldarfrysting hófst hjá fiskiðjuveri HB Granda á Vopnafirði um miðjan september er búið að frysta alls tæplega 600 tonn af afurðum að sögn Magnúsar Róbertssonar vinnslustjóra.

Magnús segir að síldin, sem barst til vinnslu í september, hafi yfirleitt verið mjög væn en upp á síðkastið hefur síldin verið blandaðri af stærð.

,,Það er farið að koma meira með af íslensku sumargotssíldinni. Það eru tekin sýni úr aflanum um borð í skipunum og það fer ekkert á milli mála hvað er norsk-íslensk vorgotssíld og svo íslensk sumargotssíld,“ segir Magnús en að hans sögn hefur hlutfall íslensku síldarinnar farið mest upp í rúman fimmtung af heildaraflanum í síðustu veiðiferðum.

Skip HB Granda eru nú að veiðum við miðlínuna á milli Jan Mayen lögsögunnar og Síldarsmugunnar en frá veiðisvæðinu eru rúmar 300 sjómílur til Vopnafjarðar. Að sögn Vilhjálms Vilhjálmssonar, deildarstjóra uppsjávarsviðs HB Granda, var Faxi RE fyrstur svæðið og í holi nú í morgunsárið fengust 460 tonn. Lundey NS fékk síðan 200  tonna hol en Ingunn AK var þá að toga og ekki var búið að hífa.

Nýjustu fréttir

31.12.2018

Gleðilegt ár

24.12.2018

Gleðileg jól

Allar fréttir