FréttirSkrá á póstlista

04.04.2009

Sigruðu í spurningakeppni Neista

Starfsmenn fiskeldisdeildar HB Granda á Djúpavogi báru sigur úr býtum á úrslitakvöldi spurningakeppni Ungmennafélagsins Neista á Djúpavogi sem haldin var á Hótel Framtíð fyrr í vikunni. Sigursveitina skipuðu Kristján Ingimarsson, Brynjólfur Einarsson og Norvald Sandö.

Fjallað er um úrslitakvöldið á heimasíðu Djúpavogshrepps og þar kemur fram að auk HB Granda þá áttu lið frá Fiskmarkaði Djúpavogs, Eyfreyjunesi og grunnskólanum á staðnum, sem skipað var kennurum, sæti í úrslitunum.

Á heimasíðunni segir:

,,Spurningahöfundar ákváðu að ,,skreyta“ umferðirnar dálítið, m.a. annars með tóndæmum, að láta liðin leika o.fl. Óhætt að segja að þessa viðbætur hafi mælst vel fyrir og eins kom berlega í ljós að stórleikarar leyndust í hverju liði því leiksigrar voru unnir hvað eftir annað í, þar sem einn úr hverju liði átti að leika 15 orð á þremur mínútum. Þó tókst leikurunum ekki að sýna fram á hvernig á að leika skjaldböku, þrátt fyrir heiðarlegar tilraunir, en við látum það nú liggja á milli hluta.

Í fyrstu umferð kvöldsins mættust kennarar Grunnskólans og Fiskmarkaðurinn í hnífjöfnum og æsispennandi leik, framan af allavega, en kennarar höfðu loks sigur 27-23.

Í annarri umferð mætust HB Grandi og ríkjandi meistarar Eyfreyjuness sem þurftu að sætta sig við ósigur gegn Grandamönnum, sem unnu nokkuð örugglega 35 - 25.

Bæði fyrir og eftir hlé var boðið upp á tónlistaratriði, þar sem Tónskólastjóri Djúpavogs, hinn ungverski József Gabrieli-Kiss fór sannarlega á kostum, enda óperusöngvari á heimsmælikvarða þar á ferð.

Í lokaumferð kvöldsins mættust síðan kennarar Grunnskólans og HB Grandi þar sem skorið var úr um hver stæði uppi sem sigurvegari spurningakeppninnar.

Það var ljóst frá upphafi að Grandamenn ætluðu sér sigurinn, enda höfðu þeir innanborðs Kristján nokkurn Ingimarsson sem áður hefur sannað sig sem fjölfróðan mann, en hann býr bæði yfir hagnýtum og ekki síður einskis nýtum fróðleik sem, þegar upp var staðið, landaði Grandamönnum sigurinn nokkuð örugglega, en viðureignin endaði 33 – 23.“

Fram kemur að um 80 manns hafi fylgst með úrslitaviðureigninni en alls fór keppnin fram á fjórum kvöldum.

Nýjustu fréttir

Allar fréttir