FréttirSkrá á póstlista

06.01.2010

Treg gulldepluveiði og leitað að loðnu

Sjö uppsjávarveiðiskip hafa stundað veiðar á gulldeplu nú eftir áramótin og hefur veiðin verið treg og farið rólega af stað eftir áramótin að sögn Vilhjálms Vilhjálmssonar, deildarstjóra uppsjávarsviðs HB Granda. Hann segir menn nú bíða spennta eftir niðurstöðum loðnuleitar á vegum Hafrannsóknastofnunar.

Tvö af skipum HB Granda, Faxi RE og Ingunn AK, fóru til veiða sl. laugardag en Lundey NS er í slipp í Reykjavík þar sem unnið er að hefðbundnu viðhaldi. Reiknað er með því að skipið geti farið til veiða á gulldeplu nk. föstudag.

Að sögn Vilhjálms fór sl. sunnudagur í leit að gulldeplu í veiðanlegu magni en sú leit bar ekki árangur fyrr en á mánudag. Þá gátu skipin verið að veiðum á meðan birtu naut en aflinn var samt ekki mikill eða um 70 til 100 tonn hjá hvoru skipi. Í gær voru aflabrögðin heldur skárri eða um 100 til 150 tonn eftir daginn. Hvort skip er því komið með ríflega 200 tonna afla eftir tvo daga á veiðum. Veiðisvæðið er á svipuðum slóðum og fyrir áramót eða í nágrenni Grindavíkurdýpis.

 Leitað að loðnu

Hafrannsóknarskipin tvö, Árni Friðriksson og Bjarni Sæmundsson, fóru til loðnuleitar í gær og segir Vilhjálmur að menn vonist til að skipin nái að fara eina umferð yfir það svæði sem helst er von til að loðna haldi sig á um þessar mundir. Sú yfirferð gæti tekið sex til sjö daga. Vilhjálmur bendir þó á að hafís sé nú á stóru svæði úti fyrir Vestfjörðum og gæti það haft áhrif á niðurstöður mælinga.

Þess má geta að á rekstraráætlun Hafrannsóknastofnunar var aðeins gert ráð fyrir því að Árni Friðriksson færi til loðnuleitar nú í byrjun ársins. Útgerðir uppsjávarveiðiskipanna tóku hins vegar þá ákvörðun að standa straum að kostnaði við loðnuleit Bjarna Sæmundssonar og þótti það vera vænlegri kostur en að senda veiðiskip í loðnuleitina með Árna Friðrikssyni.



Nýjustu fréttir

Allar fréttir