FréttirSkrá á póstlista

04.05.2011

Mikill fjöldi gesta á sjávarútvegssýningunni í Brussel

,,Sýningin hefur farið mjög vel af stað. Það er stöðugur straumur gesta hér á sýningarbásnum okkar og menn eru mjög áhugasamir. Erlendir markaðir eru heilbrigðir og traustir og spurn eftir sjávarafurðum er mjög mikil. Þá má ekki gleyma því að hér eru haldnir fjörlegir fundir og nú í hádeginu stóð Íslandsstofa fyrir mikilvægum kynningarfundi vegna Icelandic Responsible Fisheries vottunarmerkisins á Holiday Inn hótelinu hér við sýningarhöllina, en þangað var fjölda kaupenda og áhrifaaðila í sjávarútvegi boðið.“

Þetta sagði Eggert Benedikt Guðmundsson, forstjóri HB Granda, er rætt var við hann í tilefni af þátttöku félagsins í sýningunni European Seafood Exposition (ESE), en hún er haldin í Brussel samhliða véla- og tækjasýningunni Seafood Processing Europe (SPE). Sýningarnar hófust í gærmorgun og munu þær standa yfir í þrjá daga. Þetta eru fjölsóttustu sýningar sinnar tegundar í heiminum í dag en rúmlega 700 fyrirtæki víðs vegar úr heiminum taka þátt í ESE sjávarafurðasýningunni og rúmlega 200 fyrirtæki kynna framleiðsluvörur sínar á véla- og tækjasýningunni SPE. Íslensk fyrirtæki eru áberandi á sýningunum líkt og undanfarin ár en í ár taka 26 íslensk fyrirtæki þátt. Íslandsstofa hefur haft veg og vanda af því að skipuleggja þátttökuna en nefna má að þetta er í 19. sinn sem íslensku fyrirtækin kynna afurðir sínar og framleiðslu á sameiginlegu sýningarsvæði.

HB Grandi hefur tekið þátt í ESE sýningunni síðan 2005 og er þetta því í sjöunda sinn sem afurðir félagsins eru kynntar á þessum vettvangi. Í fyrra var bryddað upp á þeirri nýbreytni að fenginn var matreiðslumeistari, Þórður Þrastarson frá Akranesi, til þess að útbúa smárétti, aðallega úr sjávarfangi, sem gestum og gangandi gafst færi á að smakka. Mæltist þetta mjög vel fyrir og því var ákveðið að bjóða upp á sams konar kynningu nú. Að þessu sinni er það starfsbróðir og vinur Þórðar, Gunnar H. Ólafsson, sem stendur vaktina, en hann er kokkur á ísfisktogaranum Sturlaugi H. Böðvarssyni AK, sem HB Grandi gerir út. Gunnar er í leyfi frá sjómennskunni á meðan á sýningunni stendur og meðal þess, sem hann hefur töfrað fram í dag, eru girnilegir smáréttir þar sem makríll, loðna, þorskur, ufsi og fleiri sjávarafurðir eru í öndvegi. 

Nýjustu fréttir

Allar fréttir