FréttirSkrá á póstlista

29.06.2011

Góður makríll en rólegt yfir veiðunum

Flest íslensku uppsjávarveiðiskipin eru nú að makrílveiðum við suðausturströndina en þar hefur verið ágætis kropp að undanförnu. Rólegt er yfir veiðunum í dag, að sögn Guðlaugs Jónssonar, skipstjóra á Ingunni AK, en hann vonast til þess að aflinn glæðist með hækkandi sjávarhita.

,,Skipin eru á veiðum utan í Mýrargrunninu og Öræfagrunninu og við erum, á að giska, um 35 mílur út af Ingólfshöfðanum. Við komum hingað í gær eftir að hafa landað um 350 tonnum af makríl á Vopnafirði sl. mánudag en sá afli fékkst á einum sólarhring. Hér veiðist nánast hreinn makríll en aflinn hefur verið aðeins blandaðari hjá þeim sem reynt hafa fyrir sér dýpra,“ segir Guðlaugur en að hans sögn er hitastig sjávar enn mjög lágt, þótt það fari hægt hlýnandi.

,,Það er vetrartíð á miðunum norðaustur af landinu og þar verður væntanlega enga síld eða makríl að finna fyrr en sjórinn hlýnar. Lundey NS fór í leiðangur um þetta hafsvæði á dögunum og þar var ekkert líf. Makríllinn virðist halda sig sunnan við landið þar sem sjórinn er heldur hlýrri en ég á ekki von á því að menn verði varir við makríl fyrir vestan land fyrr en það hlýnar. Makríllinn, sem við höfum verið að veiða, er stór og góður en það mætti vera meira af honum en raunin er í dag,“ segir Guðlaugur en er rætt var við hann var Ingunn komin með um 130 tonna afla.

Af öðrum uppsjávarveiðiskipum HB Granda er það að segja að Lundey kom til Vopnafjarðar í gærmorgun með um 320 tonna afla, aðallega makríl en síldaraflinn var áætlaður um 40 tonn. Faxi RE hefur verið í Reykjavík þar sem verið er að setja sjókælikerfi (RSW) í skipið.

 

Nýjustu fréttir

Allar fréttir