FréttirSkrá á póstlista

05.03.2012

20 þúsund tonn óveidd af loðnukvóta HB Granda

Hratt hefur gengið á loðnukvóta HB Granda upp á síðkastið enda hefur veiðin verið mjög góð þrátt fyrir rysjótt tíðarfar. Síðustu sjö sólarhringa hafa skip félagsins veitt alls 15.000 tonn af loðnu og nema eftirstöðvar kvótans nú um 20.000 tonnum.

Í morgun var loðnan fremst í göngunni fyrir miðju minni Breiðafjarðar eða um 20 sjómílur NNV af Rifi. Vilhjálmur Vilhjálmsson, deildarstjóri uppsjávarsviðs HB Granda, er ánægður með gang veiða og vinnslu en þó er ljóst að ekki er langur tími til stefnu og það styttist í vertíðarlok. Í fyrra luku skip HB við að veiða loðnukvóta sinn þann 10. mars en kvótinn þá var umtalsvert minni en á yfirstandandi vertíð. Auk skipa félagsins hefur Huginn VE veitt af kvóta félagsins að undanförnu og Hoffell SU fór í eina veiðiferð í nýliðnum mánuði.

Samkvæmt upplýsingum Vilhjálms fór Víkingur AK frá Akranesi í gær og í morgun var skipið á leiðinni til Vopnafjarðar með fullfermi. Ingunn AK kom til Vopnafjarðar í nótt og þar er nú verið að vinna aflann. Faxi RE og Lundey NS eru á Akranesi. Löndun úr Faxa lýkur væntanlega í dag en Lundey býður löndunar.

 

Nýjustu fréttir

Allar fréttir