FréttirSkrá á póstlista

27.09.2012

Mjög góð síldveiði á lokasprettinum

Eftir tregveiði á síldarmiðunum um síðustu helgi og í byrjun vikunnar tók veiðin mikinn kipp sl. þriðjudagskvöld. Þá fannst síld út af Héraðsflóadjúpi, um 90 sjómílur frá Vopnafirði, og nú er Lundey NS í höfn á Vopnafirði með um 570 tonna afla sem fékkst í tveimur holum með Ingunni AK. Þegar Lundey fór af miðunum tók Faxi RE við og togaði á móti Ingunni og að sögn Kristjáns Þorvarðarsonar, stýrimanns á Ingunni, fengust rúmlega 800 tonn í tveimur stuttum holum. Skipið er nú á leið til Vopnafjarðar með aflann og er væntanlegt þangað um kl. 20 í kvöld.

,,Það var mikill kraftur í veiðunum og það þurfti ekki að toga lengi til að fá góðan afla,“ segir Kristján en að hans sögn er greinilegt að síldin er á hraðferð í austurátt og því verður þess vart lengi að bíða að veiðin innan íslenskrar lögsögu detti niður að nýju. Það skiptir skip HB Granda þó litlu máli því í dag voru aðeins óveidd um 800 til 900 tonn af norsk-íslenska síldarkvóta félagsins. Eftirstöðvar kvótans verða síðan væntanlega teknar þegar Lundey fer frá Vopnafirði í kvöld og mun þá toga á móti Faxa sem bíður á miðunum.

,,Þetta var okkar síðasta veiðiferð á vertíðinni hvað varðar norsk-íslensku síldina. Eftir löndun á Vopnafirði förum við suður og mér skilst að skipið fari í slipp. Síðan er stefnan sett á að veiðar á íslensku sumargotssíldinni hefjist um miðjan októbermánuð,“ segir Kristján Þorvarðarson.


Nýjustu fréttir

Allar fréttir