FréttirSkrá á póstlista

23.11.2012

Stórframkvæmd á hafnarsvæðinu í Reykjavík

Nú í morgun tók Vilhjálmur Vilhjálmsson, forstjóri HB Granda, fyrstu skóflustunguna að nýrri frystigeymslu og flokkunarhúsi sem rísa munu austan við fiskiðjuver félagsins á Norðurgarði í Reykjavík. Framkvæmdir hefjast á næstunni og stefnt er að því að taka byggingarnar í notkun í lok maí nk.

Að sögn Torfa Þ. Þorsteinssonar, framleiðslustjóra HB Granda og yfirmanns landvinnslu í Reykjavík og á Akranesi, verður nýja frystigeymslan 2.600 fermetrar að grunnfleti og í henni verður rými fyrir 5.000 til 6.000 tonn af frystum afurðum. Flokkunarrými verður sambyggt frystigeymslunni og verður það 1.200 fermetrar að stærð. Hönnun og eftirlit er í höndum AVH arkitekta og verkfræðistofu. Búið er að semja við ÍAV um byggingu hússins og jarðvegsvinnu og Kælismiðjuna Frost, sem útvegar frystikerfið. Rafeyri sér um allt rafmagn fyrir byggingarnar og frystikerfin.

Nýja frystigeymslan mun bæta út brýnni þörf því auk þess sem HB Grandi leigir frystirými í Örfirisey þá hafa frystar afurðir frá frystitogurum og frystihúsi verið geymdar í frystigámum og leigugeymslum bæði innanlands og erlendis.


Samkeppni um útilistaverk
Í tilefni af byggingarframkvæmdunum hefur verið ákveðið að efna til lokaðrar hugmyndasamkeppni um listaverk á eða við suðaustur gafl nýrrar frystigeymslu. Listaverkið mun verða ákveðið kennileiti við innsiglinguna að gömlu höfninni og fjölbreytt athafnasvæði hennar að vestanverðu með Hörpu við hafnarmynnið austanvert. Verkið mun verða sýnilegt víða að af hafnarsvæðinu. Hugmyndin er að listamaðurinn, einn eða í samvinnu við annan, vinni verk á suðausturgafl byggingarinnar, sjálfstætt verk framan við vegginn og/eða verk sem tengir saman veggflötinn og opið 1.300 fermetra útivistarsvæði austan hússins.

Nýjustu fréttir

Allar fréttir