FréttirSkrá á póstlista

26.02.2013

Sjófrystingin á svo sannarlega undir högg að sækja

,,Þetta er búið að vera ágætt hjá okkur. Við hófum veiðiferðina á að reyna við ýsuveiðar fyrir austan en líkt og oftast áður var þorskurinn til vandræða. Núna erum við að veiðum við SV land og hér er gullkarfavertíðin að bresta á. Ufsaveiðin er hins vegar minni en við hefðum kosið. En svona er ufsinn. Hann mætir þegar honum sýnist.“

Þetta segir Kristinn Gestsson, skipstjóri á Þerney RE, en skipið hefur nú verið að veiðum í hálfan mánuð og löndun er fyrirhuguð um miðjan næsta mánuð. Að sögn Kristins gengu ýsuveiðarnar fyrir austan nokkuð vel en auk ýsunnar var aflinn þorskur og gulllax.

,,Loðnan var gengin hjá og yfir daginn var hægt að fá þokkalega ýsuveiði en að næturlagi var mun meira um þorsk í aflanum. Við færðum okkur síðar hingað vestur eftir og erum nú að veiðum á út af Reykjanesi. Gullkarfavertíðin hefst venjulega í lok febrúar eða byrjun mars og ég get ekki kvartað yfir aflabrögðunum,“ segir Kristinn.
Kristinn man tímana tvenna sem sjómaður og skipstjóri og hann segir að togaraútgerð nú sé vart svipur hjá sjón miðað við það sem var fyrir ekki svo mörgum árum.

,,Ég trúði því varla að þegar við vorum að veiðum fyrir austan þá voru aðeins tveir togarar að veiðum á öllu hafsvæðinu frá SA-landi norður um og vestur að Hornströndum. Að vísu er nokkur fjöldi togara að veiðum í Barentshafi um þessar mundir og svo voru einhverjir fimm eða sex á Halamiðum. Mér finnst þetta samt með ólíkindum. Togaraflotinn hefur dregist verulega saman og sömuleiðis hefur hann elst. Ég fæ ekki séð að það sé svigrúm til endurnýjunar miðað við boðaðar álögur stjórnvalda. Þá finnst mér einboðið að sjófrysting sé að leggjast af því skattlagningin er með þeim hætti að á meðan hækkun auðlindagjalds á ísfisktogara og vinnslu í landi er 38% þá er hækkunin 55% á frystitogarana. Það blasir við að með því er verið að gera útgerð frystitogara óhagkvæmari,“ segir Kristinn Gestsson.

 

Nýjustu fréttir

Allar fréttir