FréttirSkrá á póstlista

27.11.2013

Helgu Maríu AK seinkar vegna óveðurs

,,Það er búið að vera snælduvitlaust veður frá því um miðja nótt. Vindhraðinn er 25 til 30 metrar á sekúndu og við höfum farið okkur rólega. Fyrir þessa síðustu brælu reiknuðum við með því að vera í Reykjavík seint í kvöld en nú er ljóst að við verðum þar í fyrsta lagi um hádegisbilið á morgun,“ sagði Eiríkur Ragnarsson, skipstjóri á Helgu Maríu AK, en er rætt var við hann var skipið að nálgast Kötlutanga eftir siglingu frá Gdansk í Póllandi.

Eins og greint hefur verið frá hefur Helga María verið í breytingum í Póllandi frá því í sumar. Verður skipið framvegis gert út sem ísfisktogari en það hefur frá upphafi þjónað sem frystitogari. Farið var frá Póllandi sl. föstudag og segir Eiríkur að sigld hafi verið stysta leið heim til Íslands. Siglingarleiðin er tæpar 1.600 sjómílur.

,,Það hefur lengst af verið kaldaskítur á heimsiglingunni en þó lentum við brælu í Norðursjónum og svo aftur núna. Skipið er létt og liggur vel í sjó og það fer vel um okkur,“ segir Eiríkur en að hans mati hafa breytingarnar á skipinu tekist mjög vel.

,,Útlitslega eru breytingarnar ekki miklar en þó er búið að loka skutnum og skipið lítur út fyrir að vera stærra fyrir vikið. Breytingar á vistarverum eru töluverðar. Það er búið að færa eldhúsið og borðsalinn framar í skipið og tvær af íbúðunum voru nýttar undir nýja setustofu. Á millidekkinu hafa flökunarvélar og frystitæki verið fjarlægð en í staðinn er kominn nýr búnaður, færibönd, þvottakör og flokkari en það er í fyrsta skipti að slíkt tæki kemur um borð í þetta skip. Reyndar hef ég aldrei séð jafn mikinn búnað í ísfisktogara áður og ef eitthvað er þá er hann meiri en sá sem við höfðum á meðan aflinn var flakaður og frystur um borð,“ segir Eiríkur Ragnarsson.

Þótt hluti búnaðarins sé kominn á millidekkið þá á eftir að stilla honum upp, festa og tengja. Annar búnaður kemur frá 3X Technology og munu starfsmenn þess fyrirtæki sjá um niðursetningu hans og tengingar auk þess fleiri fyrirtæki munu sjá um einstaka verkþætti. Hafist verður handa við það verk nk. föstudag. Ef allt gengur að óskum ætti Helga María að geta farið í fyrstu veiðiferðina sem ísfisktogari fljótlega eftir áramótin.

 

Nýjustu fréttir

Allar fréttir